काठमाडौं । सालापा विकास बैंकले सर्वसाधारणका लागि निष्कासन गरेको आईपीओको बाँडफाँड आज हुँदैछ । बिक्री प्रबन्धक मुक्तिनाथ क्यापिटलले सालापा विकास बैंकको आइपीओ आज बाँडफाँड गर्ने जानकारी दिएको हो ।
पुस १६ गतेदेखि २० गतेसम्म सर्वसाधारणका लागि खुला गरिएको उक्त आईपीओमा कुल १९.३७ गुणा आवेदन परेको छ । आईपीओमा २३ लाख ८३ हजार ४०७ जना आवेदकबाट २ करोड ७८ लाख ८४ हजार ४७० कित्ताका लागि आवेदन प्राप्त भएको हो ।
बाँडफाँड प्रक्रियाअनुसार १ लाख ४३ हजार १७० जना आवेदकले जनही १० कित्ताका दरले कुल १४ लाख ३९ हजार १७९ कित्ता सेयर प्राप्त गर्नेछन् ।
बैंकको जारी पूँजी ५२ करोड २३ लाख रुपैयाँ रहेको छ । यसमध्ये ३३ प्रतिशत अर्थात १७ लाख २३ हजार ८८० कित्ता सेयर सर्वसाधारणका लागि निष्कासन गरिएको हो । सोमध्ये १० प्रतिशत अर्थात १ लाख ७२ हजार ३८८ कित्ता सेयर वैदेशिक रोजगारीमा रहेका नेपाली नागरिकलाई पहिले नै बाँडफाँड गरिएको छ ।
त्यसैगरी, सर्वसाधारणका लागि छुट्याइएको सेयरमध्ये ०.५० प्रतिशत अर्थात २६ हजार ११९ कित्ता सेयर बैंकका कर्मचारीहरूका लागि तथा ५ प्रतिशत अर्थात ८६ हजार १९४ कित्ता सेयर म्युचुअल फन्डहरूका लागि छुट्याइएको छ ।
नेपाल राष्ट्र बैंकबाट इजाजतपत्र प्राप्त ‘ख’ वर्गको विकास बैंक सालापा विकास बैंक लिमिटेड खोटाङ जिल्लामा आधारित एक जिल्ला स्तरीय बैंक हो । बैंकको मुख्य कार्यालयसहित ६ वटा शाखा सञ्चालनमा रहेका छन् ।
