काठमाडौं । जल तथा मौसम पूर्वानुमान महाशाखाका अनुसार आज देशका अधिकांश भागमा मौसम सामान्यतया सफा रहने अनुमान गरिएको छ। यद्यपि, पहाडी तथा हिमाली क्षेत्रका केही स्थानमा हल्का वर्षा तथा हिमपातको सम्भावना रहेको महाशाखाले जनाएको छ।

महाशाखाका अनुसार कोशी प्रदेशका हिमाली, पहाडी तथा तराई क्षेत्रमा आंशिक बदलीदेखि मुख्यतया मौसम सफा रहनेछ। मधेस प्रदेशका तराईका केही स्थानमा पनि मुख्यतया मौसम सफा रहने पूर्वानुमान गरिएको छ।

त्यसैगरी बागमती प्रदेशका हिमाल, पहाड र तराई क्षेत्रमा आंशिक बदलीदेखि मुख्यतया मौसम सफा रहने सम्भावना रहेको छ। गण्डकी प्रदेशका सबै भू–भागमा आंशिक बदली रहनेछ।

लुम्बिनी प्रदेशका हिमाली तथा पहाडी क्षेत्रमा आंशिक बदली रहने र तराई क्षेत्रमा मुख्यतया मौसम सफा रहने जनाइएको छ। कर्णाली प्रदेशका हिमाली र पहाडी क्षेत्रमा मुख्यतया मौसम सफा रहनेछ। यसैगरी सुदूरपश्चिम प्रदेशका हिमाली, पहाडी र तराई क्षेत्रमा पनि मुख्यतया मौसम सफा रहने महाशाखाले जनाएको छ।