नबिल बैंकको ‘ए’ रेटिङ पुन : पुष्टि, वित्तीय मजबुतीमा थप विश्वास

काठमाडौं । नबिल बैंकको जारीकर्ता साखस्तरलाई पुनः पुष्टि गर्दै यसलाई ‘नकारात्मक प्रभावसहितको निगरानी सूची’ बाट हटाइएको छ । क्रेडिट रेटिङ एजेन्सी इक्रा नेपालले सार्वजनिक गरेको रेटिङ निर्णयअनुसार बैंकको जारीकर्ता साखस्तर [इक्रा एनपी–आईआर] ए स्तरमा यथावत राख्दै पुनः पुष्टि गरिएको हो । यसले वित्तीय दायित्व समयमै पूरा गर्ने क्षमतामा पर्याप्त स्तरको सुरक्षा रहेको संकेत गर्छ र यस्ता संस्थालाई न्यून ऋण जोखिमयुक्त मानिन्छ ।

त्यसैगरी बैंकले जारी गरेको ४ अर्ब रुपैयाँ बराबरको अधीनस्थ ऋणपत्रको साखस्तर पनि [इक्रा एनपी] एलए स्तरमै पुनः पुष्टि गरिएको छ र यसलाई पनि ‘नकारात्मक प्रभावसहितको निगरानी सूची’ बाट हटाइएको छ । यस्तो साखस्तर भएका उपकरणहरूलाई पनि समयमै वित्तीय दायित्व पूरा गर्ने पर्याप्त सुरक्षा भएको मानिन्छ र यिनमा न्यून ऋण जोखिम रहने बताइएको छ ।

साखस्तरमा गरिएको यो परिवर्तनको मुख्य आधार बैंकको पूँजीकरण स्थितिमा देखिएको सामान्य सुधार र पहिलेदेखि दबाबमा रहेको सम्पत्ति गुणस्तर सूचकमा देखिएको स्थायित्व तथा आंशिक सुधार रहेको प्रतिवेदनमा उल्लेख छ । अघिल्लो रेटिङ अवधिमा तनावमा रहेका पक्षहरूमा सुधार देखिनु यस निर्णयको प्रमुख कारण मानिएको छ । बैंकको प्राथमिक पूँजी अनुपात मध्य अप्रिल २०२६ सम्ममा ९ दशमलव ६९ प्रतिशत पुगेको छ जुन मध्य जनवरी २०२५ मा ९ दशमलव ०४ प्रतिशत थियो । यो सुधार मुख्य रूपमा ५० अर्ब रुपैयाँ बराबरको स्थायी गैर(सञ्चयी प्राथमिकता सेयर जारी गरिनुका कारण भएको हो ।

त्यसैगरी ० भन्दा बढी दिन भुक्तानी ढिला भएको कर्जा अनुपात करिब २२ प्रतिशतमा झरेको छ, जुन अघिल्लो मूल्यांकनमा करिब २९ प्रतिशत थियो । नेट नन–परफर्मिङ कर्जा र नेट नेटवर्थ अनुपात पनि करिब ७ प्रतिशतमा सुधार भएको छ, जुन अघिल्लो अवधिमा करिब १२ प्रतिशत थियो । यी सूचकहरूले बैंकको ऋण असुली र जोखिम व्यवस्थापनमा सुधार देखाएको रेटिङ प्रतिवेदनले उल्लेख गरेको छ ।

बैंकको दीर्घ इतिहास, सन् १९८४ देखि सञ्चालनमा रहेको अनुभव, बलियो बजार हिस्सा, अनुभवी व्यवस्थापन टोली र स्थापित ब्रान्ड उपस्थितिलाई पनि साखस्तर निर्धारणमा सकारात्मक आधारका रूपमा लिइएको छ । निक्षेप संरचनामा सुधार हुँदै चालु तथा बचत खाताको हिस्सा बढ्नु, सञ्चालन दक्षता र अर्थतन्त्रको आकारका कारण आधार दर तुलनात्मक रूपमा कम रहनु जस्ता पक्षहरूले बैंकको प्रतिस्पर्धात्मक क्षमता बलियो बनाएको जनाइएको छ ।

नबिल बैंकले सन् १९८४ जुलाईदेखि नेपाल अरब बैंक लिमिटेडको नाममा आफ्नो व्यावसायिक कारोबार सुरु गरेको थियो। सन् १९९७ मा संयुक्त साझेदार इमिरेट्स बैंक इन्टरनेसनल बाहिरिएपछि बैंकको नाम परिवर्तन गरी नबिल बैंक राखिएको हो। बैंकले सन् २०२२ जुलाई ११ मा अर्को ‘क’ वर्गको वाणिज्य बैंक नेपाल बङ्गलादेश बैंक लिमिटेड (एनबीबीएल) लाई प्राप्ति गरेको थियो। नबिल बैंकको केन्द्रीय कार्यालय काठमाडौँमा रहेको छ।

बैंकका प्रमुख प्रवर्द्धकहरूमा आयरल्यान्डस्थित एनबी इन्टरनेसनल लिमिटेड (३९.४४ प्रतिशत), आइएफआईसी बैंक लिमिटेड (७.७७ प्रतिशत), राष्ट्रिय बीमा कम्पनी लिमिटेड (७.६३ प्रतिशत) लगायत रहेका छन्। बैंकका प्रमुख कार्यकारी अधिकृत मनोज कुमार ज्ञवाली छन् ।

सन् २०२६ अप्रिल मध्यसम्ममा नबिल बैंकले देशभर २६८ वटा शाखा, १८ वटा विस्तार काउन्टर र ३१८ वटा एटीएममार्फत आफ्नो सेवा विस्तार गरेको थियो। सोही अवधिमा बैंकको निक्षेप आधारको हिसाबले बजार हिस्सा ८.१ प्रतिशत र कुल कर्जा प्रवाहको हिसाबले वाणिज्य बैंक उद्योगमा ९.० प्रतिशत रहेको थियो।