एजेन्सी । कोरोना भाइरस संक्रमणको नयाँ रेकर्ड बनाइरहेको भारतमा लगातार तेस्रो दिन ३ लाखभन्दा बढी संक्रमित थपिएका छन् । पछिल्लो २ दिनमा मात्रै ५ लाखभन्दा बढी संक्रमित थपिएको भारतीय स्वास्थ्य मन्त्रालयले जनाएको छ ।
पछिल्लो २४ घन्टामा ३ लाख ३२ हजार ५०३ संक्रमित थपिएसँगै सक्रिय संक्रमितको संख्या २४ लाख २८ हजार ७७५ पुगेको छ । योसँगै अहिलेसम्म भारतमा संक्रमित हुनेको संख्या १ करोड ६२ लाख ५७ हजार ३०९ पुगेको छ ।
कोरोको दोस्रो लहरमा गम्भीर बिरामी र मृत्यु हुनेको संख्या पनि बढिरहेको छ । पछिल्लो २४ घन्टामा अहिलेसम्मकै सबैभन्दा बढी २ हजार २ सय ५६ जनाको ज्यान गएको छ । योसँगै भारतमा कोरोनाबाट ज्यान गुमाउनेको संख्या १ लाख ८६ हजार ९२८ पुगेको छ ।
त्यस्तै विश्वभर एकै दिन ८ लाख ७० हजारभन्दा बढी कोरोना संक्रमित थपिएका छन् । योसँगै कोरोना संक्रमितको कुल संख्या १४ करोड ५३ लाख नाघेको छ । पछिल्लो २४ घण्टामा १२ हजार ९१४ जनाको ज्यान गएको छ । यससँगै कोरोनाबाट विश्वभर ज्यान गुमाउनेको संख्या ३० लाख ८३ हजार ९९३ पुगेको छ ।
