यस्तो छ संसार रूवाउने तस्विर र पछाडिको कथा

टर्कीको समुद्र तटमा घोप्टो परेको अवस्थामा फेला परेको एक तीन वर्षीय बालकको शवको तस्वीर टर्कीको समाचार एजेन्सी ‘दोगान’ले जारी गरेपछि विश्वको ध्यानाकृष्ट भयो । सो तस्वीर सोशल नेटवर्किङ साइटमा व्यापक फैलियो ।
मृत बालकको पहिचान सिरियाका अयलान कुर्दीका रुपमा गरिएको छ । उनी आफ्ना मातापिताका साथ अवैध रुपमा युरोप गइरहेका समयमा डुंगा दुर्घटनाको शिकार भएका हुन् ।
दुर्घटनामा उनकी आमा र दाजुको मृत्यु भयो भने पिता अब्दुल्ला भने ज्यान जोगाउन सफल भए ।
बीबीसीसँग कुरा गर्दै अयलानका पिता अब्दुल्लाले भने, ‘ग्रीसको कोस द्वीपका लागि हिँडेको केही बेरमै समुद्रमा अग्लो छाल उठ्न थाल्यो र डुंगाका कप्तान डुब्न लागेको डुंगा छोडेर भागे ।’
अब्दुल्लाका अनुसार उनले आफ्नी पत्नी र छोराहरुलाई जोगाउनका लागि निकै कोसिस गरे तर एक–एक गरी सबै डुबे ।
उनले भने, ‘मैले डुंगा घुमाउनका लागि पनि कोसिस गरेँ तर समुद्री छालले डुंगालाई अझ पर धकेल्यो ।’

सानो छोरा अयलानलाई सम्झदैं उनले भने, ‘मेरो छोरा संसारकै सुन्दर बच्चा थियो, आफ्नो बच्चालाई राम्रो नदेख्ने संसारमा को होला र ?’
भावुक हुँदै उनले अगाडी भने, ‘मेरो छोरा अद्भुत थियो । ऊ दिनहुँ खेल्नका लागि मलाई निन्द्राबाट ब्यूँझाउने गर्दथ्यो, कसैका लागि योभन्दा राम्रो अरु के हुन सक्छ ? तर अब सबै समाप्त भइसकेको छ ।’

उनले आफ्ना परिवारको चिहान छेउ बसेर रुन चाहेको बताए । ‘म आफ्ना परिवारको चिहान छेउमा बसेर रुन चाहन्छु ताकि मेरो दुःख केही हलुका होस्,’ उनले भने ।
दोगान समाचार एजेन्सीका अनुसार स्थानीय प्रहरीले यस मामलामा चार संदिग्ध मानव तस्करलाई गिरफ्तार गरेको छ । ती चारैजना सिरियाली रहेको जनाइएको छ ।
प्रहरीका अनुसार १२ सिरियाली नागरिक दुई वटा डुंगामा सवार भइ कोस द्वीपतर्फ गइरहेका बेला दुर्घटना भएको हो । समुद्री छालमा परेर दुईवटै डुंगा डुबेको हो ।
इस्लामिक स्टेट नामक आतंकवादी समूहको बढ्दो प्रभावका कारण उनीहरु बिस्थापित भई उनीहरु युरोप जान लागेका थिए । (एजेन्सी)
इमेज खवर बाट