हुलाक मार्फत पठाएको लाखाैंको चेक हुलाकै कर्मचारीले चोरेको खुलासा

हुलाक मार्फत आएको चेक चोरेर किर्ते दस्तखत गरी बैंकबाट रकम निकाल्ने तीनजनालाई महानगरीय प्रहरी अपराध महाशाखाको टोलीले पक्राउ गरेको छ ।
पक्राउ पर्नेहरुमा भक्तपुर चाँगुनारायण–५ बस्ने ३० बर्षीय सुमन दाहाल, दोलखा झुले–८ घर भएका ३२ बर्षीया देवि कार्की र भक्तपुर चागुनारायण–५ घर भई गोश्वारा हुलाक सुन्धारामा कार्यरत ३३ बर्षीया पुनम दाहाल रहेका नेपाल प्रहरीले जनाएको छ।
हुलाका मार्फत आफनो छोराले फिल्याण्डबाट पठाएको एभरेष्ट बैंकको चेक चोरी गरी देवी कार्की समेतले गत २४ गते ५ लाख रुपैया रकम निकालेको भनी म्याग्दी पाखापानी–३ घर भई काठमाडौँ महानगरपालिका–११ बस्ने थ बहादुर पुनले अपराध महाशाखामा उजुरी दिएका थिए ।
उनीहरुले वैदेशिक रोजगारीमा गएका पुनका छोरा सुरेश पुनले घरायसी कामको लागि पठाएको चेक किर्ते दस्तखत गरी सुर्य विनायक स्थित बैंकको शाखाबाट रकम झिकेका थिए ।
महाशाखाबाट खटिएको प्रहरी टोलीले रकम निकाल्ने कार्यमा संलग्न कार्कीलाई पेप्सीकोलाबाट, दाहाल द्धयलाई बानेश्वरबाट पक्राउ गरेको हो । प्रहरीले सुमन दाहालको साथबाट नगद १ लाख रुपैया तथा कानून व्यवसायीको परिचयपत्र नम्वर १३८२३ समेतका कागजात समेत बरामद गरेको थियो ।
तिनै जनालाई बैंकिङ्ग कसुर तथा सजाय ऐन र हुलाक सेवा ऐन २०१९ अनुसार आवश्यक कारवाहीको लागि महानगरीय प्रहरी बृत्त जगाती भक्तपुर पठाइएको प्रहरीले बतएको छ ।