नेपालका लागि क्रसएक्सको आधिकारिक वितरक बाइकर्स नेपालले ईएफआई युरो ५ प्रविधियुक्त नयाँ २०२२ मोडलको क्रसएक्स २५० आर नेपालमा सार्वजनिक गरेको छ ।
उक्त बाइक पहिले भन्दा अपग्रेड भएर आएको छ । कम्पनीले यसमा भएको डबल साइलेन्सर सबैभन्दा आकर्षक रहेको जनाएको छ । युवाहरुलाई डबल साइलेन्सर बाइकले धेरै आकर्षित पार्ने हुँदा साहीअनुसार डिजाइन गरिएको छ । यो बाइक डर्ट र मोटार्ड गरी दुवै सेगमेन्टमा उपलब्ध छ ।
नयाँ क्रसएक्स २५० आर मा २४९.६ सीसीको सिंगल सिलिन्डर, फोर स्ट्रोक इन्जिन रहेको छ । उक्त इन्जिनले अधिकतम ३२ एचपी पावर र २९.८ एनएम टर्क प्रदान गर्दछ । ६–स्पिड गियरबक्स भएको सो मोटरसाइकलको फ्रन्ट र रियरमा निसिन सिंगल डिस्क ब्रेक रहेको छ ।
यसको ब्रेकिङ सिष्टम जापनिज कम्पनी निसिनले बनाएको छ । कम्पनीले बाइकलाई अधिकतम १३० किलोमटिर प्रतिघन्टको गतिमा हाँक्न सकिने दाबी गरेको छ । क्रसएक्स २५० आर को लम्बाई १९८० एमएम, चौडाई ८२० एमएम, उचाई ९४० एमएम, ग्राउण्ड क्लियरेन्स ३६१ एमएम र १३८० एमएमको ह्वीलवेस रहेको छ । साथै, ६.५ लिटरको इन्धन ट्यांकी छ भने यसको वजन ११७ केजी रहेको छ ।
बाइकले ३५ किलोमिटर प्रतिलिटरको माइलेज दिन सक्ने भनिएको छ । सो मोटरसाइकलमा बेटर कोल्ड स्टार्ट, बेटर थ्रोटल रेस्पोन्स, बेटर फ्युल एफिसियन्सी र लेस मेन्टिनेन्स जस्ता विशेषता पाउन सकिन्छ । त्यसैगरी यसमा पोलीस्पोर्ट ह्यालोजन हेडलाइट रहेको छ । क्रसएक्स २५० आर रेड र ब्ल्याक गरी दुई कलर अप्सनमा उपलब्ध रहेको छ ।
नेपाली बजारमा क्रसएक्स २५० को मूल्य ८ लाख ७५ हजार रुपैयाँ तोकिएको छ । पहिले ७ लाख ६५ हजार रुपैयाँ पर्ने मोटरसाइकलको मूल्य हाल सरकारले नयाँ बजेटमार्फत कर बढाएपछि बढाइएको कम्पनीले जनाएको छ ।
