काठमाडौं । नेपाल राष्ट्र बैंकले आज शुक्रबार आर्थिक वर्ष ०७९/८० को मौद्रिक नीति सार्वजनिक गर्ने भएको छ ।
राष्ट्र बैंकका प्रवक्ता गुणाकर भट्टले मौद्रिक नीति सार्वजनिक गर्नुअघि बिहान ८ बजे राष्ट्र बैंक सञ्चालक समितिको बैठक डाकिएको जानकारी दिए । समितिले पारित गरेपछि मौद्रिक नीति सार्वजनिक गरिनेछ । राष्ट्र बैंकको अनुसन्धान विभागले प्रस्ताव गरेको चालू आर्थिक वर्षको मौद्रिक नीति व्यवस्थापन समितिले पारित गरिसकेको जनाइएको छ ।
त्यस्तै, गभर्नर महाप्रसाद अधिकारीले हिजो बिहीबार अर्थ मन्त्रालयसमेत सम्हालिरहेका प्रधानमन्त्री शेरबहादुर देउवालाई मौद्रिक नीतिका विषयमा ब्रिफिङ गरेका थिए । राजनीतिक र आर्थिक दबाबकाबीच गभर्नर अधिकारीले आफ्नो कार्यकालको तेस्रो मौद्रिक नीति ल्याउन लागेका हुन् । बजेट आएको १०-१५ दिनमा आउनुपर्ने मौद्रिक नीति यसपटक राष्ट्र बैंक र अर्थ मन्त्रालयबीचको टसलका कारण केही ढिलाइ भएको हो ।
