चीनको झण्डा जलाउनेलाइ प्रहरी द्वारा पक्राउ

चीनको झण्डा लगाएको आरोपमा प्रहरीले मधेसी मोर्चाका तीन जिल्लास्तरीय नेतालाई पक्राउ गरेको छ ।
पक्राउ पर्नेमा संघीय समाजवादी फोरमका केन्द्रीय सदस्य संजय यादव, सदभावनाका जिल्ला अध्यक्ष इमदाद गद्दी र नेपाल परिवार दलका ओमप्रकाश सर्राफ छन् । वीरगञ्ज–रक्सौल नाकाको मितेरी पुलमा धर्नामा बसेर घर फर्कने क्रममा उनीहरुलाई प्रहरीले शंकराचार्य प्रवेशद्वारवाट पक्राउ गरेको हो ।
चीनले नेपालमा इन्धन दिएपछि मधेस विरोधी भएको भन्दै मधेसी मोर्चाका नेताहरुले कात्तिक १२ गते वीरगञ्जको घण्टाघर चोकमा चीनको झण्डा जलाएका थिए ।
संयुक्त लोकतांत्रिक मधेशी मोर्चाको जनकपुरमा जारी बैठकमा पनि चीनको झण्डा जलाउने प्रकरण विवादित बनेको छ ।
नाकाबन्दी असफल पार्न चीनले इन्धन आपूर्ति गर्न लागेको भन्दै मधेशको अधिकांश जिल्लामा ब्याक अफ चाईना भन्दै चीनको विरोधमा भएको प्रदर्शनको बारेमा गंभिर कुरा उठेको छ । बैठकमा फोरम नेपालका अध्यक्ष उपेन्द्र यादवले मधेशको अधिकांश जिल्लामा चिनको विरोधमा प्रदर्शन भएको र केही ठाँउमा चीनको झण्डा समेत जलाईएको प्रकरणमा विरोध जनाएका थिए । वरिष्ठ नेता अशोक राईले मोर्चाको तर्फबाट चीनको विरोध भयो भने आफ्नो पार्टी मोर्चामा नबस्ने चेतावनी दिएको जनाएका थिए । राईको कुरामा पार्टी अध्यक्ष उपेन्द्र यादवले पनि आफ्नो समर्थन जनाएका थिए ।
तमसपाका महेन्द्र राय यादव र सद्भावना पार्टीका अध्यक्ष राजेन्द्र महतोले यसको विरोध गरेका थिए । बैठकमा केही बेर निकै तनाव भएको थियो ।
यी दुबै नेताले मधेशमा चिनियाँ विरोधलाई स्वाभाविक रूपमा लिन र यस विषयलाई बैठकको एजेण्डा नबनाउन बारम्बार आग्रह समेत गरेका थिए । उपेन्द्र यादवको अडानमा तराईमधेस लोकतान्त्रिक पार्टीले समर्थन जनाएको थियो ।