मनसुनजन्य विपत्तिको पूर्वतयारीमा लाग्न सांसद सापकोटाको आग्रह

काठमाडौं । नेकपा (माओवादी केन्द्र) का सांसद माधव सापकोटा ‘सुबोध’ ले मनुसुनजन्य विपत्तिबाट हुने क्षति न्यूनिकरणका लागि पूर्वतयारीमा लाग्न सरकारको ध्यानाकर्षण गराएका छन् ।

आज (आइतबार) बसेको प्रतिनिधि सभा बैठकलाई सम्बोधन गर्दै उनले सिन्धुपाल्चोक, मनाङ लगायतका जिल्ला जोखिमयुक्त रहेकाले समयमै पूर्व तयारीमा लाग्नका लागि सरकार समक्ष आग्रह गरेका हुन् ।

‘मैले प्रतिनिधित्व गर्ने जिल्ला सिन्धुपाल्चोक जुन विपदको दृष्टिले उच्च जोखिमयुक्त जिल्लामा पर्दछ सो लगायत अन्य जोखिमयुक्त जिल्लाहरुमा विपद पूर्व तयारी, प्रतिकार्य, पुनर्निर्माण गर्न जिल्लामा श्रोत साधन सहितको विपदको यूनिट राखियोस,’– उनले भने ।

साथै, जोखिमयुक्त बस्तीहरुलाई अस्थाई रूपमा बर्षात् अगाडि नै सुरक्षित स्थानमा स्थानान्तरण गर्ने कार्य अविलम्ब अगाडि बढाएर सम्भावित मानवीय र भौतिक क्षति न्यूनीकरण गर्न उनले सरकार समक्ष आग्रह गरेका छन् । वर्षात अगाडी नै उच्च जोखिमयुक्त पालिकाहरुका रणनीतिक बिन्दुहरुमा खाद्य र गैरखाद्य सामाग्री खरीद गरी भण्डारण गर्ने व्यवस्था मिलाउन पनि उनले आग्रह गरेका छन् ।