वीरगञ्ज । बारा प्रहरीले अमेरिकाबाट आएको पार्सलबाट लागुऔषध बरामद गरेको छ । प्रहरीले हुलाकमार्फत अमेरिकाबाट आएको पार्सलबाट गाँजासहितको लागुऔषध बरामद गरेको हो।
जिल्ला प्रहरी कार्यालय, बारा र लागुऔषध ब्युरो, वीरगञ्ज शाखाबाट खटिएको संयुक्त प्रहरी टोलीले बारा कलैया उपमहानगरपालिका १ मोतिबागमा रहेको जिल्ला हुलाक कार्यालय, कलैया नजिक विदेशबाट आएको कार्टुनबाट लागुऔषध बरामद भएको हो ।
पपकर्न म्किस ट्रिओ लेखिएको रातो रंगको टिनको डब्बाभित्र गाँजा तीन प्याकेट, ओल्ड फेसन ओट्स लेखिएको डब्बाभित्र गाँजा १ प्याकेट, क्विस्क ओट्स लेखिएको डब्बाभित्र गाँजा १ प्याकेट गरी जम्मा लागुऔषध गाँजा १ किलो १४६ ग्राम बरामद भएको हो ।
लागुऔषध बरामद भएपछि प्रहरीले पर्सा वीरगञ्ज महानगरपालिका १ बस्ने वर्ष २२ का नैमोदिन मिया, सोही स्थान बजार छपकैया बस्ने वर्ष २७ का जितेन्द्र साह सोनार र वर्ष २२ का कृष्णा सराफलाई पक्राउ गरेको बारा प्रहरीले जनाएको छ ।
पक्राउ परेका तीनै जना विरुद्ध लागुऔषध मुद्दा दर्ता गरी अदालतबाट पाँच दिनको म्याद थप गरी थप अनुसन्धान भइरहेको जिल्ला प्रहरी कार्यालय बाराले जनाएको छ ।
