प्रधानध्यापकद्वारा बालकमाथि निर्घात कुटपिट

वीरगंज । वीरगंज महानगरपालिका १९ विन्ध्यवासिनीस्थित गोल्डेन ग्लोबल इङ्गलिस बोर्डिङ स्कूलका १२ वर्षीय बालक प्रीतम साहलाई प्रधानध्यापक सफी यादवले कुटपिट गरेको घटना सार्वजनिक भएको छ ।

पुस २४ गते दिउँसो प्रअ यादवले शुल्क नतिरेको कसूरमा बालक साहलाई प्लास्टिकको छडीले निर्घात कुटपिट गरेका थिए । कुटपिटबाट बालक साहको बायाँ आँखामा गम्भीर चोट लागेको र शरीरमा नीलडाम भएको देखिन्छ । उनी अहिले नारायणी अस्पतालमा उपचारपछि घरमा छन् ।

बालकका अभिभावक बहुदरमाई गाउँपालिका ६ गम्हरिया निवासी मुकेश साहले जिल्ला प्रहरी कार्यालय, पर्सामा प्रअविरुद्ध उजूरी दिएका छन् । प्रअ यादव बहुदरमाई नपामा रहेको राधाकृष्ण चौरसिया माविको स्थायी शिक्षक हुन् ।