स्यालको टोकाइबाट एक दर्जन व्यक्ति घाइते, एक गम्भीर

रौतहट । गढीमाई नगरपालिकामा स्यालको टोकाइबाट एक दर्जन व्यक्ति घाइते भएका छन् । गढीमाई नपा ७ मा गोठालाहरू घाँस काट्न बिहिबार खेतमा गएका बेला उखुघारीबाट निस्किएको बहुला स्यालको टोकाइबाट उनीहरु घाइते भएका हुन् ।

घाइते हुनेहरुमा महेन्द्र महतो, मन्तोरिया देवी, तेतरी खातुन, जयबुल खातुन, मनीषा कुमारी, उषा देवी, रामविनय बैठा, दुखिया देवी, बिना देवी, श्रवण कुमार, सिकिलावा देवी, जयल मुखिया लगायत रहेको इलाका प्रहरी कार्यालय, गरुडाले जनाएको छ ।

घाइतेमध्ये तेतरी खातुनलाई गम्भीर चोट लागेको र उनलाई थप उपचारको लागि नेशनल मेडिकल कलेज वीरगंज पठाइएको छ । घाइतेहरूलाई खोप लगाउन प्रादेशिक अस्पताल, गौर पठाइएको समेत प्रहरीले जनाएको छ ।