रौतहट । रौतहट स्थित इलाका प्रहरी कार्यालय देवाही गोनाहीको टोलीले लागूऔषध गाँजासहित तीन जनालाई पक्राउ गरेको छ । देवाही गोनाहीबाट खटिएको प्रहरी टोलीले चेकजाँचको क्रममा लागूओषध गाँजा बरामद गरेको हो ।
जिल्ला रौतहट देवाही गोनाही न.पा. वडा नं. ०८ गोनाही बजार स्थित संग्रालय नजिक सार्वजनिक सडकमा विभिन्न सवारी साधन तथा पैदल यात्रुहरु चेकजाँच गर्ने क्रममा जयनगर देखि गोनाही बजार तर्फ जाँदै गरेको मधेश प्रदेश ०३-००१ ह २५२४ नम्बरको डाँफे अटोलाई शंका लागि चेकजाँच गर्दा गाँजा फेला परेको हो ।
उक्त अटोमा दुई वटा जेब्रा झोला भित्र लुकाई ल्याउँदै गरेको १० के.जि. ३ सय ग्राम लागूऔषध गाँजा सहित सवारी चालक सर्लाही बागमती नगरपालिका १२ बथाने टोलका वर्ष २२ को राजन मोक्तान, सोही ठाउँका वर्ष २३ का सुजन मोक्तान र वर्ष २९ की असली माया वल रहेको प्रहरीले जनाएको छ ।
