कस्तो रहला आजको मौसम ?

काठमाडौँ । देशका केही भू–भागमा आज वर्षाको सम्भावना रहेको छ । गण्डकी, कर्णाली र सुदूरपश्चिम प्रदेशका पहाडी भू–भागका एक–दुई स्थानमा छिटपुटदेखि हल्का वर्षाको सम्भावना रहेको हो ।

पश्चिमी न्यूनचापीय प्रणालीका साथै स्थानीय वायूको आंशिक प्रभाव रहँदा देशका केही भू–भागमा वर्षाको सम्भावना रहेको हो ।

जल तथा मौसम विज्ञान विभागका अनुसार बिहान कर्णाली र सुदूरपश्चिम प्रदेशलगायत देशको पहाडी भू–भागमा आंशिक बदली रहेको छ । बाँकी भू–भागको मौसम मुख्यतया सफा छ ।

विभागले आज दिउँसो सुदूरपश्चिम प्रदेशलगायत देशको पहाडी भू–भागमा आंशिकदेखि साधारणतया बदली रहने जनाएको छ । बाँकी भू–भागमा मौसम मुख्यतया सफा रहनेछ ।

गण्डकी, कर्णाली र सुदूरपश्चिम प्रदेशको पहाडी भू–भागको एक–दुई स्थानमा छिटपुटदेखि हल्का वर्षाको सम्भावना छ । उच्च पहाडी तथा हिमाली भू–भागका एकदुई स्थानमा हल्का हिमपातको सम्भावना छ ।

लुम्बिनी प्रदेशको थोरै स्थानमा हावाहुरीको समेत सम्भावना रहेको विभागले जानकारी दिएको छ । काठमाडौंमा आज मौसम सफा रहने मौसमविद् गोविन्द झा बताउँछन् । “काठमाडौंको मौसम आज सफा रहनेछ । केही बादल देखिए पनि घाम लाग्नेछ,” उनले भने ।

गण्डकी प्रदेशमा केही स्थानमा भने वर्षाको सम्भावना रहेको झाले बताए । “गण्डकीका केही स्थानमा आज वर्षाको सम्भावना छ । तर पोखराको सिटी एरियामा भने आज वर्षाको सम्भावना छैन,” मौसमविद् झाले बाह्रखरीसँग भने।

विभागका अनुसार राति देशका पहाडी भू–भागमा आंशिक बदली रहनेछ । बाँकी भू–भागमा मौसम मुख्यतया सफा रहनेछ ।कोसी, गण्डकी र कर्णाली प्रदेशको उच्च पहाडी तथा हिमाली भू–भागका एकदुई स्थानमा हल्का हिमपातको सम्भावना छ ।

केही स्थानमा छिटपुटदेखि हल्का वर्षाको सम्भावना रहेको र उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना रहेकाले त्यस क्षेत्रमा दैनिक जनजीवन लगायत कृषि, स्वास्थ्य, पर्यटन, पर्वतारोहण, सडक तथा हवाई यातायातमा आंशिक प्रभाव पर्ने विभागको भनाइ छ । त्यसैले आवश्यक सतर्कता अपनाउन विभागले आग्रह गरेको छ ।

स्थानीय वायु सक्रिय हुन थालेकाले हावाहुरीको समेत सम्भावना रहेकाले यसबाट बच्न सतर्क रहन पनि विभागको आग्रह छ । प्रि–मनसुन सुरु भएसँगै स्थानीय वायु सक्रिय हुँदा हावाहुरी र मेघगर्जनसहित चट्याङ पर्ने हुन्छ । प्रि–मनसुन सक्रिय भएकाले हावाहुरी चल्न पनि सुरु भएको हो ।