प्रभु बैंकले आफ्ना ग्राहकहरुलाई अत्याधुनिक तथा आकर्षक सेवा सुविधा उपलब्ध गराउने क्रममा ‘वेल्थ कार्ड’ प्रदान गर्ने भएको छ। ‘वेल्थ म्यानेजमेन्ट’ सेवाअन्तर्गत कुनै पनि शाखामा निक्षेप गर्ने ग्राहकलाई पहिचानको लागि बैंकले प्रधान कार्यालयबाट सो कार्ड जारी गर्ने भएको हो ।
यस्तो कार्ड प्राप्त गरेपछि ग्राहकलाई पुँजीबजार, बीमायोजना, सामुहिक लगानी कोष, अवकास कोष योजना लगायत आर्थिक रुपमा लाभदायक विभिन्न विषयमा परामर्श दिइने बैंकले जनाएको छ। यस्तो परामर्श पश्चात लगानीका अवसरहरु उपयोग गरी ग्राहकलाई उचित प्रतिफल लिन सहज हुनेछ।
यसका साथै बैंकबाट उपलब्ध हुने बैंकिङ सेवा सुविधा अन्तर्गत निशुल्क रुपमा क्रेटिड तथा डेविट कार्ड उपभोग गर्न सक्नुका अतिरिक्त बैंकबाट प्रवाह हुने कर्जाको सेवा÷प्रशासनिक शुल्क, विद्युतीय बैंकिङ्गको सेवा शुल्क, मोबाईल बैंकिङ्ग सेवा शुल्क र लकर सेवा शुल्कमा विशेष छुट सहित द्रुत बैंकिङ्ग सेवा प्राप्त गर्न सक्ने हुनेछ।
बैंक र देशका विभिन्न क्षेत्रमा ख्यातिप्राप्त तथा प्रतिष्ठित कम्पनी तथा सेवा प्रदायक संस्थारुसँग सम्झौता अनुसार बैंकको वेल्थ कार्ड लिने ग्राहकले त्यस्ता कम्पनी तथा सेवा प्रदायक संस्थाहरुबाट उपलब्ध हुने सेवाहरुमा विशेष प्राथमिकताका साथ सेवा शुल्कमा छुट प्राप्त गर्न सक्नेछन्। यस अन्तर्गत पहिलो चरणमा बुद्ध एयर, एयर एसिया, बाजेको सेकुवा, ग्राण्ड होटेल, भोजन गृह, होटेल सांग्रिला एण्ड रिसोर्ट, होटेल ग्राण्ड, बलेनो स्टोर, द नर्थ फेश, रेमण्ड सप, ग्राण्डी ईण्टरनेशनल हस्पिटल, नर्भिक ईण्टरनेशनल हस्पिटल र कान्तिपुर मिडिया ग्रुप लगायका कम्पनी तथा सेवा प्रदायक संस्थाहरुले प्रदान गर्ने सेवामा विशेष प्रथमिकता तथा अकर्षक छुट प्राप्त गर्न सक्ने व्यवस्था मिलाईएको छ।
यसैबीच मर्जर पश्चात प्रभु बैंकको चुक्ता पुँजी ५ अर्ब २४ करोड, निक्षेप ५६ अर्ब, कर्जा ४१ अर्ब, शाखा संख्या १ सय ३६, एटिएम संख्या १ सय २२ र निक्षेपकर्ताहरुको संख्या ७ लाख ५० हजार भन्दा बढि पुगेको छ।
