सन् २०२६ को लागि डिभीका लागि आवेदन खुल्यो

काठमाडौं । संयुक्त राज्य अमेरिकाले सन् २०२६ को लागि डाइभर्सिटी भिसा (डिभी) कार्यक्रमका लागि आवेदन खोलेको छ । असोज १६ गते राति ९:४५ बजेदेखि खुला हुने डीभी आवेदनको म्याद कात्तिक २० गतेसम्म दिन सकिनेछ । काठमाडौंस्थित अमेरिकी दूतावासले विज्ञप्ति निकालेर आवेदन निस्शुल्क भएको जनाएको छ ।

दूतावासले आवेदनका लागि परामर्शदाताको आवश्यकता नपर्ने भएकाले अरूको परामर्श नलिन पनि सुझाव दिएको छ । बरु, आवेदन सम्बन्धी सहयोग चाहिएमा परिवारको सदस्य, साथी वा अन्य विश्वासिलो व्यक्तिको सहयोग लिन सुझाएको छ । आवेदन फारममा श्रीमान-श्रीमति तथा २१ वर्ष नपुगेका सबै अविवाहित सन्तानलाई सूचीकृत गर्नु अनिवार्य रहेको छ । डीभीका लागि हालसालै खिचिएको फोटो आवश्यक भएको जनाइएको छ ।

डीभी परे नपरेको जानकारी २०८२ वैशाख २० गतेपछि प्राप्त हुने जनाइएको छ । अमेरिकाले डीभी कार्यक्रम अन्तर्गत विश्वका कयौं देशबाट हरेक वर्ष सयौं व्यक्तिलाई अमेरिकामा स्थायी रुपमा बसोबासको अनुमति दिइँदै आएको छ । नेपाली यो कार्यक्रम अन्तर्गत छानिएर अमेरिकामा स्थायी बसोबासमा गइरहेका छन् ।