विराटनगर किंग्सले एनपीएलको उपाधि जिते ३० लाख दिने कोशीका मुख्यमन्त्री कार्कीको घोषणा

काठमाडौं । कोशी प्रदेश सरकारले विराटनगर किंग्सले नेपाल प्रिमियर लिगको उपाधि जितेमा ३० लाख पुरस्कार दिने घोषणा गरेको छ ।

मंगलबार एनपीएल खेल्न जान लागेको विराटनगरको टिमलाई बिदाई गर्दै कोशी प्रदेश सरकारका मुख्यमन्त्री हिक्मतकुमार कार्कीले विराटनगरले उपाधि जितेमा टिमलाई प्रदेश सरकारको तर्फबाट एकमुष्ट ३० लाख दिने घोषणा गरेका हुन्।

बिदाइ कार्यक्रममा मुख्यमन्त्री कार्कीले खेल क्षेत्रमा निजी क्षेत्रको सहभागिताले थप आकर्षण बढेको बताउँदै क्रिकेटबाट राष्ट्रिय मात्र हैन, अन्तर्राष्ट्रिय पहिचान बनाउन सकिने उल्लेख गरे । “खेलकुद क्षेत्रमा प्रदेश सरकारको स्रोतसाधनले भ्याएसम्म सहयोग गर्न सरकार तयार छ,” मुख्यमन्त्री कार्कीले भने, “आगामी दिनमा खेलकुदको विकासका लागि थप योजनाहरू अघि सारिनेछ ।”

सन्दीप लामिछानेको कप्तानीमा रहेको विराटनगर आज एनपीएल खेल्न काठमाडौं आइपुगेको छ । मंसिर १५ गतेबाट सुरु हुने एनपीएलमा ८ टिमको सहभागीता रहनेछ ।