साझा यातायातले तीस ओटा सुविधासम्पन्न गाडी भित्र्याउने भएको छ । भारतीय अशोक लेल्याण्ड कम्पनीबीच गत चैत ११ गते भएको सम्झौता अनुरुप सो बसहरु भदौ पहिलो साता काठमाडौं आइपुग्ने साझा यातायातले जनाएको छ ।

उक्त बसहरुमा दुई ओटा ढोका हुनुका साथै पछाडिको ढोकाबाट ह्वीलचियर छिर्ने अपांगमैत्री हुनेछ । चालक बाहेक ४० सिट क्षमताको बसको यात्रु हिँड्ने भाग फराकिलो हुनुका साथै सुरक्षाको लागि सिसिभिटी र मनोरञ्जनको लागि डिस्प्ले टिभी रहने व्यवस्था गरिएको छ ।

काठमाडौं महानगरपालिकाले साझा यातायातमा शेयर लगानी गरेको १० करोड रुपैयाँ रकमबाट खरिद गर्न लागिएको उक्त बसहरु उपत्यकाभित्र थप शहरी यातायातको रुपमा सञ्चालनमा ल्याउने जनाइएको छ । जसबाट उपत्यकामा यात्रुहरुलाई सहज र सुविधा पुग्ने कम्पनीले विस्वास लिएको छ । हाल १७ ओटा बस रहेको साझाको नयाँ बस आएसँगै ४७ बस हुनेछन् ।

यसैबीच भारतको मुम्बईस्थित अशोक लेल्याण्डको कारखानामा बन्दै गरेको बसहरुको बढी निर्माण अवलोकन गर्न एक टोली आइतबार मुम्बई प्रस्थान गरेको छ ।