कक्षा १२ को परीक्षा फाराम खुल्यो

काठमाडौं । राष्ट्रिय परीक्षा बोर्ड, परीक्षा नियन्त्रण कार्यालय (कक्षा ११ र १२)ले ०८३ सालमा हुने कक्षा १२ को वार्षिक परीक्षाका लागि परीक्षा फाराम खुला गरेको छ। बोर्डका अनुसार नियमित तथा आंशिकतर्फ (रजिस्ट्रेसन नम्बरका सुरुका दुई अंक ७९—अन्तिमपटक, ८० र ८१ भएका) परीक्षार्थीले फाराम भर्न सक्नेछन्।

वार्षिक कार्यतालिकाअनुसार पुस मसान्तभित्र परीक्षा शुल्क बुझाउनुपर्नेछ। सो अवधिमा छुटेका विद्यार्थीले विलम्ब शुल्कसहित माघ १५ गतेसम्म फाराम भर्न सक्ने बोर्डले जनाएको छ।

बोर्डले शुल्क बुझाएको प्रमाणसहित विद्यार्थीका फाराम माघ २५ गतेसम्म विद्यालयमार्फत बुझाइसक्न निर्देशन दिएको छ।