काठमाडौं महानगर-२६ का ७७ सिसी क्यामरा फाइबर इन्टरनेटमा जोडिए

काठमाडौं । काठमाडौं महानगरपालिका–२६ ले वडाभित्र जडान गरिएका ७७ सिसी क्यामरालाई फाइबर इन्टरनेटमा जोडेको छ । नेपाल टेलिकमको सहकार्यमा बालाजु क्षेत्रका क्यामरालाई वडा कार्यालयबाट प्रत्यक्ष निगरानी गर्न मिल्ने व्यवस्था गरिएको छ।

एक करोड रुपैयाँ लागतमा जडान गरिएको प्रणालीको आज महानगर प्रमुख प्रशासकीय अधिकृत सरोज गुरागाईं, नगर प्रवक्ता नवीन मानन्धर र वडाध्यक्ष ख्यामराज तिवारीले शुभारम्भ गरेका छन्। वडाध्यक्ष तिवारीले आगामी दिनमा वडाभित्र २०० स्थानमा क्यामरा जडान गर्ने योजना रहेको बताए।

पिटीजेड र बुलेट क्यामराले क्रमशः ५५० र ६० मिटरसम्मको दृश्य स्पष्ट रूपमा कैद गर्न सक्ने जनाइएको छ।