काठमाडौं । सन् २०२५ मा नेपालमा ११ लाख ५८ हजार ४५९ विदेशी पर्यटक भित्रिएका छन् । नेपाल पर्यटन बोर्डका अनुसार डिसेम्बर महिनामा मात्र ९८ हजार १९० पर्यटक नेपाल आएसँगै वार्षिक आगमन संख्या ११ लाख नाघेको हो ।
अघिल्लो वर्ष सन् २०२४ मा ११ लाख ४७ हजार ५४८ विदेशी पर्यटक नेपाल आएको तुलनामा सन् २०२५ मा पर्यटक आगमनमा सामान्य वृद्धि भएको देखिएको छ । पर्यटक आगमनको सूचीमा भारत पहिलो स्थानमा रहेको छ । सन् २०२५ मा भारतबाट २ लाख ९२ हजार ४३८ पर्यटक नेपाल आएका छन् । त्यस्तै अमेरिकाबाट १ लाख १२ हजार ३१६ पर्यटक नेपाल भित्रिएका छन् ।
त्यसपछि चीनबाट ९५ हजार ४८०, बेलायतबाट ५८ हजार ६८४, बंगलादेशबाट ५७ हजार ५४५, अस्ट्रेलियाबाट ४९ हजार ३५७, श्रीलंकाबाट ३७ हजार ५५०, थाइल्याण्डबाट ३० हजार २४३, जर्मनीबाट ३० हजार २२७ र जापानबाट २४ हजार ७६३ पर्यटक सन् २०२५ मा नेपाल आएका पर्यटन बोर्डले जनाएको छ ।
पर्यटन बोर्डका अनुसार पर्यटक आगमनमा भएको यो वृद्धिले नेपालको पर्यटन क्षेत्र क्रमशः पुनरुत्थानको दिशामा अघि बढिरहेको संकेत गरेको छ ।
