काठमाडौँ । निजी तथा आवासीय विद्यालय अर्गनाइजेशन नेपाल (प्याब्सन) ले प्राकृतिक प्रकोप तथा विभिन्न प्रकारका विपद्का समयमा सदस्य विद्यालय तथा सम्बद्ध व्यक्तिहरूलाई व्यवस्थित, समन्वित र प्रभावकारी सहयोग उपलब्ध गराउने उद्देश्यले ‘प्राकृतिक प्रकोप तथा विपद् व्यवस्थापन विभाग’ गठन गरेको छ।

बाढी, पहिरो, भूकम्प, महामारीजस्ता प्राकृतिक प्रकोपले समय–समयमा देशभर प्रभाव पार्ने तथा त्यसका प्रत्यक्ष प्रभाव शिक्षा क्षेत्र र निजी विद्यालय समुदायमा पर्ने यथार्थलाई मध्यनजर गर्दै यस विभाग गठन गरिएको प्याब्सनले जनाएको छ।

विगतका वर्षहरूमा विपद्का बेला राहत, सहजीकरण र समन्वयका विभिन्न मानवीय अभियानहरू सञ्चालन गर्दै आएको र ती अनुभवलाई संस्थागत रूप दिन यो कदम उठाइएको जानकारी प्याब्सनका महासचिव आरबी कटवालले दिएका छन्।

प्याब्सन केन्द्रीय कार्यसमितिको निर्णयअनुसार गठन गरिएको विभागको कार्यविधि तथा सञ्चालन मोडालिटी तयारीको जिम्मेवारी केन्द्रीय उपाध्यक्ष रविन्स शर्मालाई प्रदान गरिएको छ। शर्माको संयोजनमा गठन हुने समितिमार्फत विपद् व्यवस्थापन, राहत संकलन, सहयोग वितरण तथा आपतकालीन समन्वयका गतिविधि दिगो र प्रभावकारी रूपमा अघि बढाइने अपेक्षा संस्थाले व्यक्त गरेको छ।

संस्थाले यस मानवीय तथा संस्थागत सहयोग अभियानमा सम्पूर्ण सदस्य विद्यालय, पदाधिकारी तथा प्रदेश, जिल्ला र पालिका संरचनाहरूलाई सक्रिय सहकार्य र समन्वयका लागि आह्वान गरेको छ।

इच्छुक व्यक्ति तथा संस्थाहरूले ‘PABSON Relief Fund’ नाममा NIMB बैंक– खाता नं. ००१००६०२६६१७५ मा वा क्यूआर मद्ध्यमबाट सहयोग रकम जम्मा गर्न सक्ने व्यवस्था मिलाइएको प्याब्सनले जनाएको छ।

प्याब्सनका अनुसार, विपद्का बेला राज्यबाट प्राप्त हुने सहयोग सधैं पर्याप्त नहुन सक्ने अवस्थामा संस्थागत रूपमा पीडित सदस्यप्रति सहानुभूति, सहयोग र उत्तरदायित्वपूर्ण सहभागिता जनाउनु सामूहिक दायित्व भएकाले यो पहल गरिएको हो।