इन्धन सस्तो भएसँगै आन्तरिक हवाई भाडा घट्यो,कुन गन्तव्यको कति ?

काठमाडौं । हवाई इन्धनको मूल्य घटेपछि देशका प्रमुख सहर जोड्ने अधिकांश आन्तरिक गन्तव्यका हवाई भाडा घटाइएको छ। नेपाल आयल निगमले हवाई इन्धनको मूल्य प्रतिलिटर ६ रुपैयाँले घटाएपछि नेपाल नागरिक उड्डयन प्राधिकरण (क्यान) ले नयाँ भाडादर लागू गरेको हो।

नयाँ दर अनुसार काठमाडौं–माउन्टेन फ्लाइटको भाडा २१० रुपैयाँ घट्दै प्रतियात्रु चार हजार ३ सय ९० रुपैयाँ कायम भएको छ। काठमाडौं–भद्रपुरमा १ सय ८० रुपैयाँ घटेर तीन हजार ८ सय ४५ र काठमाडौं–विराटनगरमा १ सय ४० रुपैयाँ घटेर तीन हजार ७५ रुपैयाँ तोकिएको छ।

त्यस्तै, काठमाडौं–जनकपुरमा एक हजार ६ सय ४५, भरतपुरमा एक हजार ३ सय ७०, पोखरामा दुई हजार ३०, भैरहवामा दुई हजार ६ सय ३५, नेपालगन्जमा चार हजार १ सय ७०, धनगढीमा पाँच हजार ६ सय ५५, तुम्लिङटारमा दुई हजार ३ सय ६०, सिमरामा एक हजार १ सय ५०, सुर्खेतमा चार हजार ४ सय २० र राजविराजमा दुई हजार ६ सय १५ रुपैयाँ भाडादर कायम गरिएको क्यानले जनाएको छ।

पोखराबाट हुने उडानसहित अन्य क्षेत्रीय रुटमा पनि हवाई भाडा घटाइएको छ।