पेट्रोलियम पदार्थको मूल्य घट्यो, प्रतिलिटर कति ?

काठमाडौं । नेपाल आयल निगमले आजदेखि लागू हुने गरी पेट्रोल, डिजेल र हवाई इन्धनको मूल्य घटाएको छ । निगमका अनुसार आजदेखि पेट्रोल प्रतिलिटर ३ रुपैयाँले घटेर १५६ रुपैयाँ कायम भएको छ ।

त्यस्तै, डिजेल र मट्टितेल प्रतिलिटर १ रुपैयाँले घटेर १३६ रुपैयाँमा बिक्री हुने भएको छ । नयाँ मूल्यसूची निगम सञ्चालक समितिले तय गरेको हो, जसअनुसार इन्डियन आयल कर्पोरेसनबाट माघ १ मा प्राप्त पेट्रोलियम पदार्थको नयाँ खरिद मूल्यलाई आधार मानिएको छ ।

मूल्य घटेसँग अब पहिलो वर्गअन्तर्गत पर्ने चारआली, विराटनगर, जनकपुर, अमलेखगञ्ज, भलबारी, नेपालगञ्ज, धनगढी र वीरगञ्ज क्षेत्रमा पेट्रोल प्रतिलिटर १५३ रुपैयाँ ५० पैसा पर्नेछ भने डिजेलट र मट्टितेल १३३ रुपैयाँ पर्नेछ ।

यसैगरी, दोस्रो वर्गअन्तर्गत सुर्खेत र दाङ क्षेत्रमा पेट्रोल प्रतिलिटर १५५ रुपैयाँ पर्नेछ भने डिजेलट र मट्टितेल १३५ रुपैयाँ तोकिएको छ । यसैगरी, तेस्रो वर्गअन्तर्गत काठमाडौं, पोखरा र दिपायल क्षेत्रमा पेट्रोल प्रतिलिटर १५६ रुपैयाँ पर्नेछ भने डिजेल र मट्टितेल १३६ रुपैयाँ तोकिएको छ ।