निर्वाचन सुरक्षाका कारण होली घरपरिसरमै सीमित गर्न प्रशासनको आग्रह

काठमाडौं । जिल्ला प्रशासन कार्यालय काठमाडौंले आसन्न प्रतिनिधिसभा सदस्य निर्वाचनलाई ध्यानमा राख्दै यस वर्षको होली पर्व घरपरिसरभित्रै मर्यादित रूपमा मनाउन अनुरोध गरेको छ।

प्रशासनले सार्वजनिक सूचना जारी गर्दै होलीका अवसरमा राजनीतिक दल वा उम्मेदवारसँग सम्बन्धित कुनै पनि प्रकारका प्रचार सामग्री प्रयोग नगर्न स्पष्ट पारेको छ। दलको चुनाव चिन्ह, झण्डा, लोगो वा उम्मेदवारको तस्बिर अंकित टि–सर्ट, टोपी, क्याप, ज्याकेट, कमिज, गम्छा, ब्याच, मास्क, लकेट तथा झोला प्रयोग गर्न नपाइने जनाएको छ।

उक्त निर्देशन निर्वाचन आचारसंहिता, २०८२ को परिच्छेद ४ अन्तर्गतको दफा १३ (घ) मा रहेको व्यवस्थाअनुसार जारी गरिएको प्रशासनले उल्लेख गरेको छ। सो प्रावधानअनुसार जुलुस, आमसभा वा प्रचारप्रसारमा संलग्न व्यक्तिले दल वा उम्मेदवारको निर्वाचन चिन्ह अंकित सामग्री प्रयोग गर्न नपाउने व्यवस्था रहेको बाइएको छ।

यस वर्ष फागुन १८ गते पहाडी जिल्लाहरूमा तथा फागुन १९ गते तराई क्षेत्रमा होली मनाइँदैछ। प्रशासनले कसैको इच्छाविपरीत रङ लगाउने, पानीको लोला वा फोहोर हान्ने, बाटोमा होहल्ला तथा झैझगडा गर्ने जस्ता गतिविधि नगर्न चेतावनी दिएको छ। यस्ता कार्य भएमा प्रचलित कानुनअनुसार कारबाही गरिने जनाएको छ।

त्यसैगरी, खुला सडक वा सार्वजनिक स्थानमा भिडभाड गर्ने, मेला–महोत्सव आयोजना गर्ने, मञ्च बनाएर सांगीतिक कार्यक्रम सञ्चालन गर्ने तथा मादक पदार्थ बिक्री–वितरण र सेवन गर्न समेत रोक लगाइएको प्रशासनले जनाएको छ।