विद्यार्थीलाई नतिजा सार्वजनिक भएको १५ दिनमै ट्रान्सक्रिप्ट दिने विश्वविद्यालको निर्णय

काठमाडौँ । विश्वविद्यालयका परीक्षा नतिजा सार्वजनिक भएको १५ दिनभित्र ट्रानसक्रिप्ट उपलब्ध गराउने व्वयस्था लागू गर्ने भएको छ । शिक्षा,विज्ञान तथा प्रविधिमन्त्री सस्मित पोखरेलको उपस्थितिमा चैत २० गते बसेको विश्वविद्यालयका उपकुलपतिहरुको बैठकले यस विषयमा सहमति जनाएको हो ।

शिक्षामन्त्रालयको निर्णयअनुसार परीक्षा नतिजा प्रणालीलाई अझ व्यवस्थित र अनुमानयोग्य बनाउन परीक्षा नियन्त्रण कार्यालयले छुट्टै नतिजा पोर्टल निर्माण गर्नेछ । त्यस्तैगरी नतिजा प्रकाशित भएको अधिकतम १५ दिनभित्र ट्रान्सक्रिप्ट दिने व्यवस्था अनिवार्य रुपमा लागू गरिनेछ ।

उच्च शिक्षाको राष्ट्रिय शैक्षिक क्यालेन्डरलाई प्रभावकारी बनाउन विश्वविद्यालय अनुदान आयोगका सचिवको संयोजकत्वमा समिति गठन गर्ने निर्णय पनि गरिएको छ । उक्त समितिले १५ दिनभित्र नयाँ शैक्षिक क्यालेन्डर तयार गरी पेश गर्नेछ ।

त्यस्तैगरी विद्यार्थी सेवामा सुधार ल्याउन २४ सै घण्टा सञ्चालन हुने बहु-च्यानल गुनासो व्यवस्थापन प्रणाली लागू गरिनुका साथै विद्यार्थीले आफ्नो शैक्षिक प्रमाणपत्र मोबाइल एप ,नागरिक एप वा इमेृल मार्फत डाउनलोड गर्न सक्ने डिजिटल प्रणाली विकास गर्ने निर्णय पनि भएको छ ।