आज तराईका केही भूभागमा बिहानपख हुस्सु लाग्ने

काठमाडौं। हाल देशमा पश्चिमी न्यून चापीय प्रणालीका साथै मनसुनी वायुको प्रभाव समेत रहेको छ।

जल तथा मौसम विज्ञान विभाग, मौसम पूर्वानुमान महाशाखाका अनुसार हाल कोशी, मधेश र बागमती प्रदेशमा साधारणतया बदली (आंशिक देखि साधारणतया बादल) रहेको छ भने बाँकी भूभागमा आंशिक बदली रहेको छ। कोशी, मधेश र बागमती प्रदेशका थोरै स्थानमा मेघगर्जन र चट्याङ्गसहित हल्कादेखि मध्यम वर्षा भइरहेको छ।

दिउँसो देशको हिमाली र पहाडी भूभागमा आंशिकदेखि साधारणतया बदली रहने तथा तराई भूभागमा मौसम मुख्यतया सफा रहनेछ। कोशी र बागमती प्रदेशका हिमाली र पहाडी भूभागका थोरै स्थान तथा गण्डकी, लुम्बिनी, कर्णाली र सुदूरपश्चिम प्रदेशका हिमाली र पहाडी भूभागका एक-दुई स्थानमा मेघगर्जन र चट्याङ्गसहित मध्यम वर्षाको सम्भावना छ।

राति भने देशको हिमाली र पहाडी भूभागमा आंशिक बदली रहने तथा तराई भूभागमा मौसम मुख्यतया सफा रहनेछ। कोशी, बागमती र कर्णाली प्रदेशका हिमाली भूभागका एक-दुई स्थानमा मेघगर्जन र चट्याङ्गसहित हल्का वर्षा वा हिमपातको सम्भावना छ। साथै, तराईका केही भूभागमा बिहानपख हुस्सु लाग्ने सम्भावना छ।

कोशी र बागमती प्रदेशका हिमाली भूभागमा मध्यम वर्षा वा हिमपातको सम्भावना रहेकोले सर्वसाधारण तथा सम्बन्धित सबै सरोकारवाला निकायहरूलाई पछिल्लो मौसमी सूचना तथा पूर्वानुमानबारे नियमित रूपमा जानकारी लिई आवश्यक तयारी तथा सतर्कता अपनाउन महाशाखाले अनुरोध गरेको छ।