रौतहट चन्द्रनिगाहपुर स्थित दुर्गा माध्यमीक विधालयको कक्षा १० मा अध्ययनरत जनार्जन पोखरेल हिजो आज बिहान सबेरै उठछन् l नियमित सरसफाई पश्चात उनलाई स्कुलको चौरमा कति बेला पुग्ने भन्ने हतारो हुन्छ l जनार्जन एक प्रतिनिधि पात्र मात्र हुन् l उनी जस्ता अन्य भाई बहिनीहरु हरेक बिहान ६: ३० बजे विधालयको चौरमा भेला भइसकेका हुन्छन् l त्यसपछि उनीहरु शारीरिक तालिम अन्तर्गत व्यायाम, मास पिटी, तेक्वादो लगायतमा अभ्यास गर्छन् l देशमा विपद र राष्ट्रिय संकट परेको बेला युवाहरुलाई परिचालन गर्ने उदेश्य अनुरुप नेपाल सेना मार्फत नेपाल सरकारले रौतहटको दुर्गा माध्यमीक विध्यालयको कक्षा ८,९ र १० मा अध्ययनरत ६० जना विधार्थी भाई बहिनीहरुलाई राष्ट्रिय सेवा दलले तालिम दिइरहेको छ l गत साउन महिना देखी उनीहरुलाई तालिम दिइरहेको छ l राष्ट्रिय सेवा दलले दिएको तालिममा उनीहरु हरेक दिन बिहान अढाई घण्टा अभ्यस्त रहन्छन l उनीहरु हाल मास पिटी, खाली हात ड्रिल, खुकुरी ड्रिल लगायतका तालिम लिइरहेका छन् l राष्ट्रिय सेवा दलले तालिम दिने जुनियर डिभिजन अन्तर्गत यो ४३ औ ब्याच हो l तालिम हाल नेपालको ६८ ओटा जिल्लामा भइरहेको छ l करिब १०० दिन अवधि सम्म दिने एनसीसीको तालिममा ७९ दिन जिल्लामा र २१ दिन जिल्ला बाहिर हुन्छ l उक्त तालिम सकिय पछि उनीहरुलाई वार्षिक सामुहिक क्याम्पमा तेक्वान्दो, मास पिटी, खुकुरी ड्रिल, फिल्ड क्राफ्ट, नक्सा हेर्ने, घोड चडी, पौडी, रक क्लाइम्वीङ, एरोविक्स जस्ता आधारभूत सैन्य तालिम दिइने छ l त्यस्तै नेतृत्व विकास, ट्राफिक सचेतना, खानेपानी तथा सरसफाइ, प्राथमिक स्वास्थ्य उपचार, विपद व्यवस्थापन, दिक्षान्त कवाज लगायत सिकाइने एनसीसी समन्वयन केन्द्रले जनाएको छ l राष्ट्रमा ठूलो विपद परेको बेला वा राष्ट्र संकटमा परेको अवस्थामा युवाहरुलाई अनुशासीत एवंम् मर्यादित ढंगले परिचालन गर्नु तालिमको मुख्य उदेश्य हो l तालिममा सहभागी छात्र जनार्जन तालिमले नेतृत्व क्षमताको विकास भइरहेको बताउँछन् l उनी भन्छन् ‘ पहिले ठूला मान्छेको अगाडी गएर बोल्न डराउथे तर हाल आफ्नो कुरा खुलस्त राख्न सक्ने आत्मविश्वास आएको छ l भविष्यमा देशका लागी केही गर्न सक्छु भन्ने आँट आएको छ l तालिमको सुरुवाती दिनमा असहज भए पनि हाल अझ राम्रो गर्न सक्ने प्रेरणा जागेको छ l