किन सुते रातभर सडकमा महाबिर पुन ?

काठमाडौं, १६ बैशाख । राष्ट्रिय आविष्कार केन्द्रका अध्यक्ष महाबिर पुन शुक्रबार राति रातभर सडकमा सुतेका छन्।

उनी शुक्रबार राति माइतीघर मण्डालाको सडकमा सुतेका हुन्।

शुक्रबारदेखि नै अनुसन्धान, नवप्रवर्तन र आविष्कार कोषको कार्य अघि बढाउनुपर्ने, अनुसन्धान, नवप्रवर्तन र आविष्कार गर्ने नेपालीका लागि प्रत्येक वर्ष संघीय र प्रदेश सरकारले कम्तिमा १ प्रतिशत रकम छुट्याउनुपर्नेलगायतका माग राखेर पुन आन्दोलनमा उत्रेका थिए।

उनले शुक्रबार नै आन्दोलन र धर्ना दिन र रातभर हुने जानकारी दिएका थिए। उनले रातको धर्नामा भाग लिन चाहानेहरुलाई स्वागत गर्दै ओड्ने ओछ्याउने लिएर आउन आग्रहसमेत गरेका थिए।

शनिबार बिहान पुनले फेसबुकमा स्टाट्स राख्दै रातभर सडकमा सुतेको जनाएका छन्। उनले लेखेका छन्, ‘लु, हामी चाहिँ माइतीघर मण्डलाको सडकमा रात भर सुतेर उठ्यौँ। जनताहरु सुति रहनुहोस् र नेपाल सरकारलाई मज्जाले सुत्न दिइरहनु होस्। के त होला र ? केही चिन्ता छैन। हद्दै भए यहिँ नेपाल त जाला। पृथ्वी ता रहि रहन्छ नि।’