बेजोसले प्रेमिका लरेनसँग विवाह गर्दै

काठमाडौँ । इ-कमर्स वेबसाइट अमेजनका संस्थापक तथा विश्वका दोस्रो धनी व्यापारी जेफ बेजोसले यसै वर्षको अन्त्यमा आफ्नी ५५ वर्षीया प्रेमिका लरेन सान्चेजसँग विवाह गर्न लागेका छन् । यो विवाह डिसेम्बर २८ मा कोलोराडोको एस्पेनमा हुने भएको छ । डेली मेल र न्यूयोर्क पोस्टका अनुसार शीतकालीन थिममा बनाइएको यो भव्य विवाहमा करिब ६० करोड डलर खर्च हुनेछ ।

५५ वर्षीया लरेन सान्चेजको जन्म डिसेम्बर ९, १९६९ मा अल्बुकर्क, न्यू मेक्सिकोमा भएको थियो । लरेन सान्चेज एक सफल पत्रकार, इजाजतपत्र प्राप्त पायलट र परोपकारीको रूपमा परिचित छन् । सान्चेज मिडिया, उड्डयन र अन्तरिक्ष अन्वेषणको क्षेत्रमा पनि काम गरिरहेकी छन् । लरेनले लस एन्जलसमा डेस्क सहायकको रूपमा पत्रकारितामा आफ्नो क्यारियर सुरु गरेकी थिइन् । यसपछि उनले फक्स स्पोर्ट्समा एन्करको रुपमा काम गरेकी थिइन् । यस अवधिमा उनले एमीका लागि मनोनयन पनि प्राप्त गरेकी थिइन् । उनलाई २००५ मा फक्सको हिट शो सो यु थिंक यु क्यान डान्सको मूल होस्टको रूपमा कास्ट गरिएको थियो ।

२०१६ मा, सान्चेजले ब्ल्याक ओप्स एभियसनको स्थापना गरेकी थिइन् । जुन पहिलो महिलाको स्वामित्वमा रहेको हवाईयन फिल्म र निर्माण कम्पनी थियो । बेजोससँग सम्बन्धमा आउनुअघि लरेनले सन् २००५ मा हलिउड एजेन्ट प्याट्रिक ह्वाइटसेलसँग विवाह गरिन् । उनले प्याट्रिकलाई १३ वर्षपछि २०१९ मा सम्बन्धविच्छेद गरेकी थिइन् । प्याट्रिकसँग उनका दुई सन्तान छन् । इभान नामको एक छोरा र एला नामको छोरी ।

जेफ र लरेन २०१८ मा सम्बन्धमा आएक थिए । योसँगै जेफ बेजोसले २०१९ मा आफ्नी श्रीमती म्याकेन्जी स्कटसँग सम्बन्धविच्छेद गरेका थिए । दुवैले सन् १९९४ मा विवाह गरेका थिए । बेजोसका तीन छोरा र एक धर्मपुत्री छोरी छन् । म्याकेन्जी स्कटलाई विश्वकै धनी महिलामा गनिन्छ । जेफसँग उनको सम्बन्धविच्छेद पछि, म्याकेन्जी स्कटले विज्ञान शिक्षक डेन जेवेटसँग पुन: विवाह गरेकी थिइन् ।

मिडिया रिपोर्टहरूका अनुसार जेफ बेसोजले केभिन कोस्टनरको १६० एकर जमिनलाई विवाह स्थलको रूपमा रोजेका छन् । यदि रिपोर्टहरू विश्वास गर्ने हो भने, जेफले विवाह अघि महँगो सुशी रेस्टुरेन्ट मात्सुहिसा बुक गरेका छन् । यो डिसेम्बर २६ र २७ को लागि बुकिङ गरिएको छ । जहाँ पूर्व विवाह समारोह हुनेछ । यो विवाहमा विश्वका धेरै चर्चित व्यक्तित्वहरु सहभागी हुने भएका छन् । बिहेमा चर्चित अर्बपति बिल गेट्स, हलिउड अभिनेता लियोनार्डो डिक्याप्रियो, जोर्डनकी रानी रानिया र क्रिस जेनर लगायत धेरै सेलिब्रेटीहरु सहभागी हुन सक्ने बताइएको छ ।