सिराहामा मोटरसाइकल र साइकल बीच ठक्कर, तीन जनाको मृत्यु

सिराहा । सिरहा नगरपालिका १८ स्थित सडकमा शुक्रवार दिउँसो भएको मोटरसाइकल र साइकल ठक्कर दुर्घटनामा तीन जनाको मृत्यु भएको छ । सन्हैठाबाट सिराहातर्फ आउँदै गरेको प्र २-०१-००३ प ३२२० नम्बरको मोटरसाइकलले साइकलयात्रीलाई ठक्कर दिँदा मोटरसाइकलमा सवार २ जना र साइकलयात्री १ जनाको मृत्यु भएको हो ।

दुर्घटनामा गम्भीर घाइते भएका मोटरसाइकल चालक कल्याणपुर नगरपालिका १२ बस्ने २९ वर्षीय नरेश कुमार मुखिया, मोटरसाइकलमा सवार सुखीपुर नगरपालिका ८ घर भएका कल्याणपुर नगरपालिका २ चतरी बस्ने २८ वर्षीय प्रदिप मुखिया र साइकलयात्री सिरहा नगरपालिका २ का ६५ वर्षीय कुशेश्वर राय उपचारको क्रममा प्रादेशिक अस्पताल सिरहामा निधन भएका छन् ।

प्रहरीले घटनास्थलमा पुगेर आवश्यक अनुसन्धान थालेको छ भने सडक दुर्घटना न्यूनीकरणका लागि यातायात नियम पालना गर्न सबैलाई सचेत गराएको छ ।