पछिल्लो २४ घण्टामा थप ४९० जनामा कोरोना भाइरस संक्रमण पुष्टि भएको छ । बुधबार ६०३ जनामा संक्रमण पुष्टि भएकोमा विहिबार ४ सय ९० जना पुगेको हो । छिमेकी देश भारतमा कोरोनाले भयावह रुप लिँदै गर्दा नेपालमा पनि त्यसको असर देखिएको छ भने पछिल्लो समय संक्रमितको संख्या बढ्दै गएको हो ।
संक्रमण बढ्दै गएपछि सरकारले स्वास्थ्य मापदण्ड पालनामा जोड दिँदै आएपछि प्रभावकारी कार्यान्वयन हुन सकेको छैन । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ५ जनाको ज्यान गएको छ भने १५७ जना निको भएको पनि मन्त्रालयले जनाएको छ ।
यससँगै देशभर कोरोना संक्रमितको संख्या २ लाख ८२ हजार ५४ पुगेको छ भने निको हुनेको संख्या २ लाख ७४ हजार ६ सय ४ पुगेको छ । यस्तै हालसम्म ३ हजार ६६ जनाको मृत्यु हुँदा सक्रिय संक्रमित ४ हजार ३ सय ८४ जना रहेका छन् ।
