विराटनगर । चराउन ल्याएका मौरीले टोकेर मोरङको कानेपोखरी गाउँपालिका–५ भौंसाबारीमा १ जना वृद्धको मृत्यु भएको छ । ४ जना घाइते भएका छन् ।

मौरीले टोक्दा कानेपोखरी–५ का ८४ वर्षीय टीकाराम भट्टको मृत्यु भएको मोरङ प्रहरीका प्रवक्ता डीएसपी दीपक श्रेष्ठले जानकारी दिए । उनका अनुसार मौरीले टोकेर मंगलबार दिउँसो गम्भीर घाइते भएका वृद्धको उपचारका क्रममा रमाइलो हेल्थ केयरमा मृत्यु भएको हो । शव पोस्टमार्टमका लागि उर्लाबारीको मंगलबारे अस्पतालमा लगिएको छ ।

कानेपोखरी–५ का ६८ वर्षीय झबर यादव, ३६ वर्षीय मानबहादुर सुनार, २० वर्षीया जेनिसा राजवंशी र ५५ वर्षीय शोखलाल ऋषिदेव घाइते भएका छन् । सामान्य अवस्थाका उनीहरुको रमाइलो हेल्थ केयरमा उपचार गराइएको छ । चराउन ल्याउने क्रममा बिच्किएका मौरीले अन्य स्थानीयलाई पनि टोकेको प्रहरीले जनाएको छ ।

झापाको शिवसत्ताक्षी नगरपालिका–९ का ३८ वर्षीय ओमदेव बस्नेत र ४५ वर्षीय पशुपति अधिकारीले चितवनबाट गाडीमा राखेर मौरी चराउन कानेपोखरी ल्याएको प्रहरीले जनाएको छ । प्रहरीका अनुसार २२ घार मौरी चराउन ल्याएको खुलेको छ । गाडीबाट मौरीलाई चराउन निकाल्ने क्रममा एउटा घार भुइँमा खसेर फुटेको थियो ।

घार फुटेपछि बिच्किएका मौरीले वरपर हिँडडुल गरिरहेका स्थानीयलाई टोकेको प्रहरीले जनाएको छ । घटनापछि बस्नेत र अधिकारीलाई प्रहरीले नियन्त्रणमा लिएको थियो । तर, खोजी भएको बेला उपस्थित हुने शर्तमा दुवै जनालाई छाडिएको प्रहरीले जनाएको छ । डीएसपी श्रेष्ठले घटनाको अनुसन्धान भइरहेको जानकारी दिए ।