क्लबले पनि तोड्यो अल्भेससँगको सम्झौता

काठमाडौँ । ब्राजिलियन डिफेन्डर डानी अल्भेस यौन दुर्व्यवहार आरोपमा पक्राउ परेपछि मेक्सिकन क्लब पुमासले उनीसँगको सम्झौता रद्द गरेको छ । गत डिसेम्बरमा बार्सिलोनाको एक नाइट क्लबमा दुर्व्यवहार गरेको आरोपमा शुक्रबार पक्राउ परेपछि पुमासले अल्भेससँगको सम्झौता तोडेको हो ।

पुमासले तत्काललाई लागू हुनेगरी सम्झौता रद्द गरिएको जनाएको छ । बार्सिलोनाका पूर्व डिफेन्डर अल्भेसले ३९ वर्षको उमेरमा गत कतार विश्वकपमा ब्राजिलियन टिमबाट विश्वकप खेलेका थिए । २०२२ को डिसेम्बर ३० मा उनले महिलालाई यौन दुर्व्यवहार गरेको बताइएको छ ।

शुक्रबार प्रहरीमा उपस्थित भएका अल्भेसले आरोप अस्वीकार गरेका छन्। उनले नाइट क्लबमा उपस्थित भए पनि आफूले दुर्व्यवहार नगरेको दाबी गरेका छन् ।

उनले प्रहरीसमक्ष भनेका थिए, ‘म नाच्नका लागि शौखिन छु । साथीहरूसँग नाइट क्लब गएको हो, नाचेको पनि हो तर कुनै महिलालाई यौन दुर्व्यवहार गरेको छैन । म ती महिलालाई चिन्दिनँ पनि जसले आरोप लगाएकी छिन् ।’