उत्तेजित भीडले प्रतिकार गरेपछि इमरान खानलाई पक्राउ गर्न प्रहरी फेरि असफल

एजेन्सी । पाकिस्तानी पूर्वप्रधानमन्त्री इमरान खानलाई गिरफ्तार गर्ने‍ प्रहरीको तेस्रो प्रयास असफल भएको छ । मिसन ईमरान ‘अरेस्ट’ अभियानका साथ मंगलबार तेस्रो पटक खानलाई पक्राउ गर्न निवासमै पुगेको इस्लामावाद प्रहरी रित्तो हात फर्किएको हो ।

तोसाखाना मुद्दामा प्रहरीले उनलाई पक्राउ गर्ने तयारी गरेपछि खानका समर्थकहरूको उत्तेजित भीडले प्रतिकार गरेपछि प्रहरीले उनलाई पक्राउ गर्न सकेको छैन भने लाहोरमा हिंसा भड्किएको छ ।

प्रमुख प्रतिपक्षी दल तहरीक-ए-इन्साफ (पीटीआई) का अध्यक्ष खानले प्रहरीले पक्राउ गर्न खोजेपछि मंगलबार सामाजिक सञ्जालमार्फत सहयोगको अपिल गरेका थिए ।

इस्लामावाद प्रहरी र रेन्जर्स कमाण्डो खानलाई पक्राउ गर्न उनको घर जमान पार्कमा पुगेपछि समर्थकहरूले निरन्तर सुरक्षाकर्मीमाथि ढुंगामुढा प्रहार गरेका थिए । दुई पक्षबीचको झडपमा इस्लामावादका केही प्रहरी र प्रदर्शनकारी घाइते भएका छन् ।