ज्वानो धेरै स्वस्थ्यकर मसला हो । यसले हाम्रो दैनिक जीवनमा देखिने स्वास्थ्य समस्याहरुलाई सजिलै समाधान गर्न सक्छ ।
हामीले सहज तरिकाले दुई चम्चा भुटेको ज्वानो एक कप पानीमा एक रात ढडाएर राख्ने र विहान यसलाई उमालेर, ज्वानो छानेर, सेलाएर वा नउमालीकन छानेर मात्र पनि खाली पेटमा पिउन सकिन्छ । यसको दैनिक सेवनले रोगसँग लड्ने क्षमता बढाउँछ । ज्वानो पोलेको धुवाँले हाम्रो सासप्रश्वासलाई सहज बनाउँछ । यसले हाम्रो पाचनमा सहयोग गर्छ र तौल बढ्न नदिन सहयोग गर्छ ।
भान्सामा ज्वानाको प्रयोगले शरीरको फोहोर निकाल्न, किटाणुविरुद्ध लड्न, घाउहरु भर्न, दुखाई कम गर्न, पेटभित्रको हावाबाट मुक्ति दिनजस्ता फाइदाहरु गर्छन् । यसलाई तराईमा अजमाईन पनि भनिन्छ ।
पातलो कपडामा ज्वानो धुलो राखेर बेलाबेलामा सुँघ्ने गर्दा बन्द भएको नाक, दमका बिरामी, ब्रोन्काइटिस तथा माइग्रेनका कारण टाउको दुख्नेहरुलाई पनि यसले आराम दिने जनाइएको छ । कबजियत भएका बच्चाहरुलाई कबजियत हुँदा, खाना नपच्दा, चिसो वा खोकी लाग्दा पनि ज्वानो खुवाउने गरेका देखिन्छ ।
यसले अपच हुने, पेट दुखाई, पेट पोल्ने, हावा भर्ने, वाकवाकी लाग्ने, आदि जस्ता समस्याबाट राहत प्रदान गर्छ । ग्यास्ट्रिकले छातीसम्म पोलेको जस्तो अनुभूति हुँदा एक चम्चा जिरा, एक चम्चा ज्वानो, आधा चम्चा अदुवाको धुलोलाई पानीमा मिलाएर दुखाई कम नभएसम्म खाँदा निको हुन्छ ।
ज्वानोले पानीमा चियापत्ति वा ग्रीन टी, ज्वानो, अदुवा र अलैँची राखेर उमालेर खाँदा उपयुक्त हुन्छ । त्यस्तै, यसमा दूध हालेर कम्तिमा तीन मिनेटसम्म उमालेर यसरी चिया पिउँदा पनि चिसो लागेको हराउँछ ।
