नवौं राष्ट्रिय खेलकुद स् पुरूष क्रिकेट आजबाट

काठमाडौँ । नवौं राष्ट्रिय खेलकुद अन्तर्गतको पुरूष क्रिकेट प्रतियोगिता आजबाट काठमाडौंमा सुरू हुँदैछ। नवौं राष्ट्रिय खेलकुद आगामी असोज २८ देखि कात्तिक ३ सम्म गण्डकी प्रदेशमा आयोजना हुनेछ। तर, पुरूष क्रिकेट भने अगाडि नै सुरू हुन लागेको हो।

प्रतियोगिताको पहिलो दिन बिहीबार चार खेलहरू हुनेछन्। दुई खेल कीर्तिपुरस्थित टियु क्रिकेट मैदानमा र दुई खेल मुलपानी मैदानमा हुनेछन्। टियु क्रिकेट मैदानमा हुने उद्घाटन खेलमा एनआरएनए नेपाल टिमले सुदूरपश्चिम प्रदेशसँग प्रतिस्पर्धा गर्नेछ। खेल बिहान ९स्१५ बजे सुरू हुनेछ।

यस्तै टियुमै हुने दोस्रो खेलमा बागमती प्रदेशले प्रदेश १ को सामना गर्नेछ। यस्तै मुलपानी मैदानमा आजै हुने पहिलो खेलमा मधेस प्रदेशले गण्डकी प्रदेशको सामना गर्नेछ। मुलपानी मैदानमै हुने दोस्रो खेलमा लुम्बिनी प्रदेशले कर्णाली प्रदेशको सामना गर्नेछ। प्रतियोगितामा तीन विभागीय, सात प्रदेश तथा एनआरएन नेपालको टोली गरी ११ टिमको सहभागिता रहेको छ। सहभागी ११ टोलीलाई दुई समूहमा विभाजन गरिएको छ।

समूह ए मा त्रिभुवन आर्मी क्लब, नेपाल पुलिस क्लब, गण्डकी, लुम्बिनी, मधेश प्रदेश र कर्णाली प्रदेश छन्। समूह बी मा एनआरएन नेपाल, बागमती प्रदेश, सुदूरपश्चिम प्रदेश, प्रदेश एक र एपिएफ छन्। हरेक समूहको शीर्ष दुई दुई टोलीले सेमिफाइनल खेल्नेछन्। सेमिफाइनल भदौ ३० र फाइनल भदौ ३१ मा हुनेछ।