साफ यू-२० च्याम्पियनसिपमा नेपालले आज श्रीलंकासँग खेल्ने

काठमाडौं । भारतको भुवनेश्वरमा आयोजित साफ यू-२० च्याम्पियनसिपमा आज नेपाल आफ्नो दोस्रो खेल श्रीलंकासँग खेल्ने भएको छ ।

भुवनेश्वरस्थित कालिंगा स्टेडियममा नेपाल र श्रीलंकाबीच साँझ सवा ७ बजे(नेपाली समय) खेल सुरु हुने जनाइएको छ । नेपालले पहिलो खेलमा माल्दिभ्समाथि ४-० को जित हासिल गरेको थियो । नेपालले आजको खेलमा श्रीलंकालाई हराई फाइनल यात्रा तय गर्ने लक्ष्य लिएको छ । श्रीलंका भने पहिलो खेलमा बंगलादेशसँग १-० ले पराजित भएको थियो ।

नेपालका मुख्य प्रशिक्षक मेघराज केसीले श्रीलंका विरुद्धको खेलमा अझ राम्रो प्रदर्शन गर्ने दाबी गरेका छन् । पाँच टिम सहभागी च्याम्पियनसिपमा सिंगल राउण्ड रोविनका आधारमा खेल हुनेछ र शीर्ष दुई टिम फाइनलमा पुग्ने छन् ।