मकवानपुर, ४ वैशाख
गृहमन्त्री राम बहादुर थापा ‘बादल’ को प्रमुख आतिथ्यमा मकवानपुरको हेटौंडामा
आयोजित कार्यक्रमबीच ३ नम्बर प्रदेश स्तरीय सुरक्षा गोष्ठी बुधबार सम्पन्न भएको नेपाल प्रहरीले बताएको छ । नेपाल सरकार गृह मन्त्रालयको वार्षिक कार्यक्रम अनुरुप मंगलबारदेखि उक्त गोष्ठी सुरु भएको थियो ।
गोष्ठी समापनका अवसरमा गृहमन्त्री थापाले देश र नागरिकलाई समृद्धिको शिखरतर्फ
पुर्‍याउने जनप्रतिनिधिहरुको जिम्मेवारी पुरा गर्न समाजमा शान्ति स्थापना, अमनचयन र
स्थायित्व हुनुपर्ने बताउनुभयो । विकास र समृद्धिका लागि आर्थिक एवम् औद्योगिक क्रान्ति
आवश्यक रहेको चर्चा गर्दै उहाँले भन्नुभयो “राष्ट्रिय पूँजीको संरक्षण विकास र परिचालनबाट नै
विकास सम्भव छ ।”
भ्रष्टाचार, विकृति, विसंगतिलाई निर्मूल गरे मात्र शान्ति स्थापना गर्न सहज भई विकास
सम्भव हुने उल्लेख गर्दै गृहमन्त्री थापाले शान्ति विरोधी विखण्डनकारीहरुलाई निश्तेज पार्न
नागरिकलाई स्वायत्तता प्रदान गर्नुपर्नेमा जोड दिनुभयो । संघीयता कार्यान्वयनको प्रक्रियामा
रहेको अवस्थामा केही अन्योलता आएको चर्चा गर्दै गृहमन्त्री थापाले सबै समस्या विस्तारै
समाधान हुने विश्वास व्यक्त गर्नुभयो । सुशासन, शान्ति सुरक्षा र सुरक्षा निकायमा राज्यले
पर्याप्त लगानी गर्नुपर्ने आवश्यकता देखिएको उहाँले बताउनुभयो ।
कार्यक्रममा ३ नम्बर प्रदेशका आन्तरिक मामिला तथा कानुनमन्त्री शालिकराम
जमकट्टेलले समयसापेक्ष र समस्याको गहिराईबाट बुझ्न सके सुरक्षा चुनौतिको सामना गर्न

सकिने चर्चा गर्दै आपसी समन्वयबाट नै शान्ति सुरक्षा कायम गर्न सकिने बताउनुभयो । भौतिक
संरचना, साधन स्रोत र जनशक्ति व्यवस्थापन गर्न प्रहरीलाई पर्याप्त बजेट व्यवस्थापन गरी
संगठन बलियो बनाए मात्र प्रहरीले आफ्नो कार्य सहज र सरल तरिकाले गर्न सक्ने विचार उहाँले
व्यक्त गर्नुभयो ।
उक्त अवसरमा गृहसचिव प्रेम कुमार राईले राज्य संचालन संक्रमणकालीन अवस्थामा
रहेको चर्चा गर्दै यस अवस्थामा देखिएका कमी कमजोरीहरुलाई निराकरण गर्न प्रभावकारी
व्यवस्थापन र समन्वयको आवश्यकता रहेको बताउनुभयो ।
सीमित स्रोत साधनका आधारमा राज्यले अवलम्वन गरेको राज्य व्यवस्था विस्तारै
सफलता प्राप्त गर्दै गएको चर्चा गर्दै गृह सचिव राईले सेवा प्रवाह र कार्यालय व्यवस्थापनमा सबै
निकायले व्यावसायिक रुपमा दुरुस्त काम गरेमा सबै समस्या समाधान हुने बताउनुभयो ।
राष्ट्रिय समृद्धिका लागि प्रदेश र स्थानीय तहबीच आपसमा प्रभावकारी समन्वय हुनुपर्नेमा
उहाँले जोड दिनुभयो ।
गोष्ठीमा उक्त प्रदेशको विद्यमान शान्ति सुरक्षाको अवस्था, समस्या तथा चुनौती,
समाधानका उपाय एवं आगामी कार्यक्रम लगायतका विविध विषयमा छलफल, अन्तरक्रिया र
प्रस्तुतीकरण भएको थियो ।
गोष्ठीमा सुरक्षाविद प्रा.डा. ईन्द्रजित राई, प्रहरी महानिरीक्षक सर्वेन्द्र खनाल, सशस्त्र
प्रहरी महानिरीक्षक शैलेन्द्र खनाल र राष्ट्रिय अनुसन्धान विभागका प्रमुख गणेश अधिकारी, ३
नम्बर प्रदेशका मुख्य सचिव, गृह मन्त्रालयका उच्च पदस्थ अधिकारीहरु, ३ नम्बर प्रदेश प्रहरी
कार्यालयका प्रमुख प्रहरी नायव महानिरीक्षक दिपककुमार थापा, नेपाली सेनाका प्रतिनिधिहरु,
३ नम्बर प्रदेश स्तरीय सुरक्षा निकायका प्रमुखहरू, उक्त प्रदेश अन्तर्गतका १३ जिल्लाका प्रमुख
जिल्ला अधिकारीहरु तथा सुरक्षा निकायका प्रमुखहरूको सहभागिता रहेको थियो ।