आइपीएल: मुम्बईसँग सन्दीपको टिम दिल्ली पराजित

एजेन्सी । इण्डियन प्रिमियर लिग आइपीएल क्रिकेटको बिहीबारको खेलमा नेपाली लेग स्पिनर सन्दीप लामिछानेको टिम दिल्ली क्यापिटल्स पराजित भएको छ ।

दिल्लीस्थित फिरोज साह कोट्ला क्रिकेट मैदानमा बिहिबार भएको खेलमा मुम्बईले दिल्लीलाई ४० रनले पराजित गरेको हो । मुम्बइले दिएको १६९ रनको लक्ष्यसहित जवाफी ब्याटिङ गरेको दिल्लीले २० ओभरमा ९ विकेट गुमाएर १ सय २८ रन मात्र बनाउन सक्यो ।

यसअघि टस जितेर पहिले ब्याटिङ गरेको मुम्बइले २० ओभरमा ५ विकेट गुमाएर १६८ रन बनाएको थियो । मुम्बईका लागि क्रुनल पाण्डेले अविजित ३७ रन बनाउँदा डि ककले ३५ रन बनाए ।

हादिर्क पाण्डेयले ३२ रन जोड्दा कप्तान रोहित शर्माले ३० रनको योगदान दिए । सुर्यकुमार यादवले २६ रन बनाए । दिल्लीका कागिसो रबडाले २ विकेट लिए । भने, अमित मिश्रा र अक्सर पटेलले १–१ विकेट लिए । मुम्बइविरुद्ध खेलमा दिल्लीले नेपाली लेग स्पिनर सन्दीपलाई भने खेलाएन् ।